Selfoss hefur fengið Þorstein Aron Antonsson aftur á láni frá Fulham.
Þorsteinn er aðeins 18 ára gamall. Hann var á láni hjá Stjörnunni fyrri hluta sumars.
Þorsteinn mun halda aftur til Fulham eftir að tímabilinu hér heima lýkur. Selfoss er í sjöunda sæti Lengjudeildar karla með 21 stig.
Yfirlýsing Selfoss
Þorsteinn Aron er kominn heim!
Þorsteinn Aron Antonsson er genginn í raðir Selfoss á láni frá enska úrvalsdeildarfélaginu Fulham. Þorsteinn er öllum Selfyssingum kunnugur en hann lék stórt hlutverk í liði Selfoss sem komst upp um deild sumarið 2020. Þorsteinn var lánaður til Stjörnunnar í vetur en er nú mættur aftur í vínrautt.
,,Ég er ánægður með það að vera kominn aftur heim á Selfoss og fá að spila á besta velli landsins. Það eru spennandi hlutir að gerast hérna og ég ætla að gera mitt allra besta til þess að hjálpa liðinu í toppbaráttunni,” sagði Þorsteinn við undirskriftina.
Eftir tímabilið hér heima heldur Þorsteinn síðan aftur út til Englands þar sem hann mun spila með Fulham í vetur.
Velkominn heim Þorsteinn!
