Tölfræði Vals með Aron Jóhannsson inni á vellinum annars vegar og án hans hins vegar er mjög mismunandi á þessari leiktíð í Bestu deild karla. Það var vakin athygli á þessu í hlaðvarpsþættinum Dr. Football í gær.
Heimir Guðjónsson var í gær látinn fara frá Val eftir slæmt gengi liðsins á tímabilinu. Ólafur Jóhannesson er tekinn við á nýjan leik.
Valur er í fimmta sæti deildarinnar með 20 stig, fjórtán stigum á eftir toppliði Breiðabliks.
Aron Jóhannsson kom til Vals í vetur og er liðið með góða tölfræði með hann innaborðs. Hann hefur byrjað sjö leiki og fimm þeirra hafa unnist. Einn fór jafntefli og einn tapaðist. Að meðaltali gera þetta 2,28 stig í leik.
Í þeim sex leikjum sem hann hefur ekki byrjað er Valur hins vegar aðeins með fjögur stig. Það gera að meðaltali 0,66 stig í leik. Það þarf að teljast afar slappt.