Það voru þónokkrir Íslendingar sem voru í eldlínunni erlendis í dag en spilað var í deildum í Skandinavíu sem og í Hvíta-Rússlandi.

Ari Leifsson lék með liði Stromsgodset í efstu deild Noregs er liðið tapaði 1-0 gegn Álasund á útivelli.

Hólmbert Aron Friðjónsson komst á blað hjá liði Lilleström sem vann 3-1 sigur á Kristiansund. Hólmbert fékk að byrja leikinn og skoraði þriðja mark liðsins í sigrinum.

Brynjólfur Andersen Willumsson kom inná sem varamaður hjá Kristiansund þegar 13 mínútur voru eftir.

Samúel Kári Friðjónsson og markmaðurinn Patrik Gunnarsson léku með Viking einnig í efstu deild og byrjuðu báðir í 1-1 jafntefli við Rosenborg.

Í B-deildinni skoraði Jónatan Ingi Jónsson annað mark Sogndal sem tapaði 3-2 gegn KFUM Oslo.

Hörður Ingi Gunnarsson og Valdimar Þór Ingimundarson byrjuðu einnig fyrir Sogndal sem er í sjötta sæti deildarinnar með 20 stig úr 12 leikjum. Valdimar lagði upp fyrsta mark liðsins í leiknum.

Í Svíþjóð mættust tveir Íslendingar er Ari Freyr Skúlason og Aron Bjarnason byrjuðu í viðureign Norrköping og Sirius.

Leiknum lauk með 1-0 útisigri Sirius þar sem Yukiya Sugita gerði eina mark leiksins.

Sveinn Aron Guðjohnsen kom einnig inná sem varamaður er Elfsborg gerði 1-1 jafntefli við topplið Hacken. Elfsborg situr í sjöunda sæti deildarinnar.

Willum Þór Willumsson byrjaði þá hjá BATE í Hvíta-Rússlandi er liðið gerði 1-1 jafntefli við Energetik BGU. Willum spilaði fyrstu 80 mínútur leiksins.