Hegðun Gabriel Martinelli í markalausu jafntefli Arsenal og Liverpool í gærkvöldi hefur vakið mikla reiði, ekki síst hjá Gary Neville, fyrrverandi varnarmanni Manchester United og sérfræðingi Sky Sports, sem sagði framgöngu Brasilíumannsins skammarlega.

Atvikið átti sér stað á lokasekúndum leiksins þegar Conor Bradley, bakvörður Liverpool, datt illa og virtist meiðast alvarlega á hné. Skömmu síðar gekk Martinelli að Bradley, henti boltanum að honum og ýtti honum af vellinum til að reyna að halda leiknum áfram.

Neville lét í sér heyra í beinni útsendingu. „Ég er hreinlega brjálaður út í Martinelli. Ég skil ekki hvernig Liverpool-mennirnir gjörsamlega lömdu hann ekki,“ sagði hann og bætti síðar við að Martinelli hefði hagað sér eins og fífl.

Ummælin vöktu hörð viðbrögð á samfélagsmiðlum, þar sem margir töldu Neville ganga of langt. „Martinelli var klárlega í órétti, en það er galið að Neville hvetji til þess að ráðist verði á hann,“ skrifaði einn netverji og margir tóku undir.