Það er ekki á óskalista Alfred Schreuder, stjóra Ajax, að losna við sóknarmanninn Antony í sumar en hann er orðaður við ýmis lið.

Antony er á meðal annars orðaður við Manchester United þar sem Erik ten Hag er stjóri en hann var áður hjá hollenska félaginu.

,,Við viljum halda Antony hjá Ajax. Ég vil vinna með honum og félagið veit það,“ sagði Schreuder í samtali við ESPN.

Antony er 22 ára gamall en hann hefur spilað með Ajax í tvö ár eftir að hafa komið frá Sao Paulo árið 2020.

Það eru enn þrjú ár eftir af samningi leikmannsins sem hefur komið að 42 mörkum í 78 keppnisleikjum síðan hann skrifaði undir.

Schreuder vonast því innilega til að halda Brasilíumanninum en ef nógu hátt tilboð berst gæti hann þurft að kveðja.