Heimir Hallgrímsson segir í samtali við Vísir.is að hann sé ekki að fara að taka við Val í dag. Hann er sterklega orðaður við starfið sem Heimir Guðjónsson er í dag.
Valur hefur tapað fjórum leikjum í röð í Bestu deildinni og í bikarnum og er staða Heimis því til umræðu.
Heimir Guðjónsson hefur ekki látið ná í sig síðustu daga og sömu sögu er að segja um Börk Edvardsson formann knattspyrnudeildar Vals.
„Ég er með nokkra möguleika í gangi og er ekkert að fara að ákveða strax. En ég er ekkert að fara í Val í dag. Hvað verður í framtíðinni? Kannski einhvern tímann en ég er ekki á leiðinni í Val í dag. Ég stefni á að fara út og er með möguleika í dag á að fara út, og það hefur alltaf verið í forgangi að fara út,“ segir Heimir við Vísi.
Heimir hefur verið án starfs í heilt ár eftir að hann hætti hjá Al-Arabi í Katar.
