Viaplay hefur tryggt sér réttinn að Þjóðadeildinni (Nations League) á Íslandi og mun sýna leiki íslenska karlalandsliðsins í knattspyrnu í opinni dagskrá. Fyrsti leikur Íslands verður gegn Ísrael 2. júní næstkomandi.

„Með því að tryggja okkur sýningarrétt á leikjum í Þjóðadeildinni og öllum leikjum íslenska karlalandsliðsins til 2028 stígum við mikilvægt skref sem leiðandi íþróttastreymisveita,“ segir Hjörvar Hafliðason íþróttastjóri Viaplay á Íslandi.

„Við höfum tekið inn marga nýja, unga og spennandi leikmenn, erum með lið sem við erum að þróa og byggja upp og þessir leikir sem eru framundan í Þjóðadeildinni munu nýtast okkur vel á þeirri vegferð. Þjóðadeildin er alvöru mót sem gefur okkur kost á að þróa liðið í keppnisleikjum og það eru virkilega góðar fréttir að knattspyrnuáhugafólk geti séð leikina í opinni dagskrá á Viaplay“, segir Arnar Þór Viðarsson, þjálfari íslenska karlalandsliðsins í knattspyrnu.

Ísland mætir Ísrael í Þjóðadeildinni 2. júní, Albaníu 6. júní, Ísrael 13. júní og Albaníu þann 27. september.

Þjóðadeildin er keppni á vegum Knattspyrnusambands Evrópu sem fer fram á haustin á tveggja ára fresti, áður en undankeppnir Evrópu- og Heimsmeistaramóta hefjast.

Ísland átti að keppa á móti Rússlandi en leiknum hefur verið aflýst og mun landslið Íslands í staðinn keppa vináttulandsleik við San Marínó 9. júní. San Marínó situr neðst á heimslista FIFA og telst því með slakari landsliðum heims.
Ef litið er til Heimslista FIFA má búast við að Ísland sé í hnífjöfnum riðli. Ísland er í 63. sæti heimslista FIFA, Ísrael í 76. sæti og Albanía í 66. sæti. Ísland gæti því átt góðan möguleika á góðum úrslitum gegn þessum sterku andstæðingum. Ísland er með sterkan hóp og marga nýja, unga og spræka leikmenn sem eru að stíga sín fyrstu skref með A-landsliðinu.

Aðeins leikir Íslands verða í opinni dagskrá á Íslandi. Með áskrift verður svo hægt að horfa á alla leiki í Þjóðadeildinni.