Fram tók á móti Val í Bestu deild karla í Safamýrinni í gær. Valur þurfti á öllum stigunum að halda til að halda í við topplið Blika og komst í forystu á 16. mínútu þegar Ágúst Eðvald Hlynsson setti boltann í netið eftir fína sókn en Guðmundur Magnússon jafnaði fyrir Fram með skalla á 27. mínútu eftir sendingu frá Fred.

Valsarar urðu manni færri undir lok fyrri hálfleiks þegar Birkir Heimisson var rekinn af velli eftir að hafa fengið sitt annað gula spjald í leiknum. Þá fór Sveinn Sigurður, markvörður liðsins, af velli snemma leiks vegna meiðsla og Kristján Hjörvar Sigurkarlsson kom inn á í hans stað.

Það vakti mikla athygli þegar Kristján Hjörvar hljóp inn á völlinn en treyja hans var merkt Guy Smit aðalmarkverði liðsins sem einnig er meiddur.

Þetta var til umræðu í Stúkunni á Stöð2 Sport í gærkvöldi og var sagt frá því að þetta væri ekki í fyrsta sinn sem ungur leikmaður Vals væri að spila sinn fyrsta leik í treyju sem ekki væri merkt honum.

Guðmundi Benediktssyni sem stjórnaði þættinum í gær blöskraði þetta og hvernig Valur kæmi fram við unga leikmenn.

„Reynið að gera þetta vel,“ sagði Guðmundur og horfði í myndavélina en hann lék með Val um árabil.