Christian Eriksen gæti fljótlega snúið aftur í ensku úrvalsdeildina.
Eins og frægt er hneig þessi 29 ára gamli Dani niður í leik með landsliði sínu gegn Finnum á Evrópumótinu í sumar. Hjarta hans stöðvaðist en viðbragðsaðilar björguðu lífi hans.
Eriksen fékk bjargráð græddan í sig. Vegna þess þurfti hann að yfirgefa Inter á Ítalíu vegna reglna deildarinnar sem fara gegn því að hægt sé að leika með slíkt tæki.
Miðjumaðurinn lék áður með Tottenham í ensku úrvalsdeildinni. Antonio Conte, stjóri liðsins, hefur sagt Eriksen að hann sé velkominn til æfinga með liðinu.
Þrátt fyrir það orðar Sky Sports Eriksen nú við Leicester. Það gæti farið svo að Daninn leiki undir stjórn Brendan Rodgers þar.