Eric Cantona fyrrum framherji Manchester United ætlar ekki að horfa á Heimsmeistaramótið í Katar undir lok árs. Hann segir ástæðuna vera hvernig farið er með verkamenn þar í landi.
Fjöldi verkamanna hafa látið lífið við byggingu leikvanga í Katar fyrir mótið. Flestir verkamenn koma frá Nepal en mikil gagnrýni hefur verið á aðbúnað og laun þeirra í Katar.
„Mér er alveg sama um næsta Heimsmeistaramót, þetta er ekki alvöru mót í mínum huga,“ sagði Cantona.
„Þetta snýst bara um peninga, það er hræðilegt hvernig komið er fram við verkamennina. Þúsundir hafa látið lífið. Ég mun ekki fagna þessu móti.“
„Ég mun ekki horfa, ég veit að fótbolti er bara rekstur eins og allt annað. Það er samt ótrúlegt að fólk hafi kosið með HM í Katar.“