Miklar vangaveltur eru í kringum íslenska landsliðið, framtíð lykilmanna og hvort þjálfararnir hreinlega haldi áfram ef stjórn KSÍ heldur áfram að skipta sér af liðsvali þeirra. Málið var rætt í hlaðvarpsþættinum The Mike Show í dag.
Flestum ætti að vera kunnugt um málavexti síðustu vikna þar sem stjórn sambandsins bannaði Arnari Viðarssyni að hafa Kolbein Sigþórsson í hópi sínum. Liðið kláraði verkefni sitt í síðustu viku og er á leið í annað verkefni í byrjun október.
Fram kom í Morgunblaðinu í vikunni að reyndir leikmenn í landsliðinu hætti að mæta í verkefni, ætli stjórnin að skipta sér af vali Arnars í hópinn. Guðni Bergsson formaður KSÍ og stjórnin sögðu af sér vegna ásakana um að sambandið væri að hylma yfir meint kynferðisbrot landsliðsmanna.
„Reyndar er Kolbeinn í tímabundnu leyfi hjá Gautaborg, mál sem er löngu búið að klára.,“ sagði Mikael Nikulásson í hlaðvarpsþættinum The Mike Show í dag.
Mikael fór þá í gegnum leikmannalista KSÍ og fór yfir menn sem gætu hugsanlega hætt miðað við frétt Morgunblaðsins. „Gylfi er úti, Alfreð er nánast aldrei með og er alltaf meiddur. Þá erum við að horfa í leikmenn eins og Kára Árnason, sem gefur kannski ekki einu sinni kost á sér ef Víkingur er í bikarúrslitum. Síðan eru leikmenn eins og Birkir Bjarnason og Jóhann Berg Guðmundsson, Birkir Már Sævarsson mætir eflaust alltaf. Þetta eru reyndustu leikmennirnir, ég get ekki ímyndað mér að 26 ára Albert Guðmundsson hætti,“ sagði Mikael.
Mikael telur að Arnar Þór og Eiður Smári Guðjohnsen gætu hugsanlega sagt upp störfum ef stjórnin fer að skipta sér af valinu. „Ef að þetta gerist þá verður mest spennandi að sjá hvort landsliðsþjálfararnir verði í verkefninu,“ sagði Mikael.
Sigurður Gísli Snorrason tók þá til máls. „Arnar ætlar að segja af sér ef hann fær ekki að velja sitt besta lið,“ sagði Sigurður.
Mikael botnar ekki í því að málefni Kolbeins sé til umræðu þessa dagana, málið hafi átt sér stað árið 2017. Síðan hafi það verið leyst með sáttargreiðslu til tveggja kvenna sem sökuðu Kolbein um ofbeldi.
„Mál Kolbeins er löngu búið. Það poppaði aftur upp núna, núna er þetta aftur búið. Það er búið að koma fram að þetta sé ekki allt satt og rétt, Kolbeinn greiddi skaðabætur og baðst afsökunar. Þetta á að vera búið, það verður allt vitlaust ef hann verður valinn,“ sagði Mikael um næsta hóp.
Mikael sagði að það yrðu ekki 9 þúsund hoppandi kátir stuðningsmenn á næsta leik ef leikmenn sem sakaðir hafa verið um ofbeldi mæta.. „Er ekki kominn tími til að hætta að hlusta á þann hóp,“ sagði Sigurður Gísli og átti þar við aðgerðarhópinn Öfga.
Hópurinn boðaði bæði til mótmæla og samstöðufundar í síðasta verkefni landslisðins. „Þá mæta þessar sjö hræður frá Öfgum og mótmæla, það hlustar enginn á þann hóp,“ sagði Sigurður um það hvort mótmælt yrði aftur í Laugardalnum í október.
Mikael endaði svo á að ítreka að áhugavert verði að fylgjast með málinu ef Arnari verður bannað að velja ákveðna leikmenn. „Það verður að spennandi að sjá hvort þessir menn mæta eða hvort þjálfararnir taki þátt í þessu. Símtal frá þeim sem ráða um sem dæmi að hann eigi ekki að taka Kolbein í verkefnið, þá held ég að hann hætti.“
Þáttinn má hlusta á í heild hér að neðan.