Jón Guðni Fjóluson var í byrjunarliði Hammarby sem tapaði fyrir toppliði Djurgarden á útivelli í sænsku úrvalsdeildinni í dag.

Hammarby náði forystunni á 19. mínútu með marki frá Gustav Ludwigson en Magnus Eriksson jafnaði fyrir Djurgarden á 30. mínútu. Hjalmar Ekdal og Joel Asoro komu svo heimamönnum í 3-1 með tveimur mörkum á tveimur mínútum.

Edward Chilufya skoraði fjórða mark Djurgarden á 74. mínútu og 4-1 sigur heimamanna niðurstaða. Djurgarden er á toppnum með 37 stig eftir 18 leiki. Hammarby er í 6. sæti með 27 stig.

Tveir aðrir leikir fóru fram í sænska boltanum í dag. Kalmar vann 4-1 sigur á Degerfors þar sem Oliver Berg skoraði tvennu. Kalmar er í 7. sæti með sama stigafjölda og Hammarby. Degerfors er í 13. sæti með 18 stig.

IFK Göteborg vann þá 2-0 heimasigur á Halmstad. Tobias Sana og Marcus Berg skoraði mörk Göteborg sem er í 11. sæti með 22 stig. Halmstad er sæti neðar með 20 stig.