Leikmenn allra liða í ensku úrvalsdeildinni munu halda áfram að krjúpa á kné fyrir leiki á næstu leiktíð til að styðja baráttuna gegn kynþáttahatri.

Þessi hefð hófst hjá knattspyrnuliðum víða um heim í kjölfar þess að George Floyd var myrtur af lögreglumanninum Derek Chauvin í Minneapolis í Bandaríkjunum í fyrra.

Leikmenn krupu til að mynda á kné allt síðasta tímabil í ensku úrvalsdeildinni.

Það er full ástæða til þess að halda áfram að vekja athygli á mikilvægi þess að beita sér gegn kynþáttahatri. Það sást vel í sumar er Marcus Rashford, Bukayo Saka og Jadon Sancho urðu fyrir kynþáttaíði á netinu í kjölfar þess að hafa brennt af vítaspyrnum sínum í úrslitaleik Evrópumótsins gegn Ítalíu. Allir eru leikmennirnir dökkir á hörund.

Á Englandi, sem og víðar, eru ekki allir sammála um að rétt sé að leikmenn krjúpi á kné fyrir leiki. Það var til að mynda alltaf hluti af stuðningsmönnum enska landsliðsins sem baulaði á liðið er það kraup fyrir leiki á Evrópumótinu í sumar.

Hægt verður að sjá viðbrögð stuðningsmanna í ensku úrvalsdeildinni er hún hefst síðar í mánuðinum. Fólk fær loksins að mæta aftur á völlinn eftir áhorfendabann sökum kórónuveirufaraldursins.

Enski boltinn á 433 er í boði