Tveir leikir hafa farið fram það sem af er kvöldi í 11. umferð Lengjudeildar karla.
Þægilegt hjá Þór gegn Þrótti
Þór tók á móti Þrótti Reykjavík og vann öruggan sigur.
Fannar Daði Malmquist Gíslason kom heimamönnum yfir á 21. mínútu. Kairo Edwards-John jafnaði fyrir Þrótt skömmu síðar.
Fannar Daði kom Þór aftur yfir áður en fyrri hálfleik lauk. Staðan var 2-1 í leikhléi.
Heimamenn fengu víti í upphafi seinni hálfleiks. Ólafur Aron Pétursson fór á punktinn og skoraði. Ásgeir Marínó Balvinsson gerði svo út um leikinn með fjórða marki Þórs á 62. mínútu.
Jóhann Helgi Hannesson átti svo eftir að bæta einu marki við fyrir Þórsara. Lokatölur 5-1.
Þór er í sjöunda sæti deildarinnar með 15 stig. Þróttur er í ellefta sæti, fallsæti, með 7 stig.
Óvæntur sigur Gróttu í Eyjum
Grótta heimsótti ÍBV og vann mjög sterkan sigur.
Staðan var markalaus eftir fyrri hálfleik þar sem Eyjamenn gátu þó nagað sig í handarbökin yfir því að hafa ekki skorað.
Axel Sigurðarson skoraði sigurmark Gróttu á 54. mínútu. Eyjamenn náðu ekki upp takti eftir markið. Lokatölur 0-1.
ÍBV er í öðru sæti deildarinnar með 22 stig. Grótta er í áttunda sæti með 14 stig. Liðið sleit sig aðeins frá fallsvæðinu með sigrinum.