Twitter-reikningur að nafni Kit it Out bað á dögunum um hjálp við að skaffa fjölskyldu í krefjandi stöðu nýjum fötum. Fjölskyldan, sem er frá Liverpool á Englandi, varð fyrir því gífurlega óláni að lenda í því að húsið þeirra varð fyrir eldingu. Liverpool-goðsögnin, nú sparkspekingurinn, Jamie Carragher ákvað að rétta fram hjálparhönd.

,,Fólk, við þurfum á ykkar aðstoð að halda. Við erum að reyna að hjálpa fjölskyldunni sem lenti í því að elding skall á húsinu þeirra í síðustu viku. Þau komust út en aðeins með þau föt sem þau voru í, við þurfum að græja ný föt fyrir þau. Getur einhver aðstoðað?“ Stóð í færstu Kit it Out.

Carragher hafði þá samband við reikninginn, grennslaðist fyrir um hvaðan fjölskyldan væri og hversu mörg börn væru hluti af henni.

,,Ég gef þeim 3 þúsund pund (518 þúsund íslenskar krónur) til að fá sér einhver föt. Ég sendi peninginn á þig,“ skrifaði Carragher.

Sá sem er á bakvið reikninginn Kit it Out ákvað að deila skilaboðunum á Twitter til þess að sýna fólki þetta frábæra framtak fyrrum knattspyrnumannsins.

Hér fyrir neðan má sjá skjáskot af samskiptum þeirra í heild sinni.