Arnór Borg Guðjohnsen, leikmaður Fylkis, var í gær staddur í viðræðum við Breiðablik. Þetta kom fram í hlaðvarpsþættinum Dr. Football.
Meðlimir þáttarins höfðu undir höndum mynd af leikmanninum í Smáranum, æfingasvæði Blika. Myndina má sjá neðst í fréttinni.
Samningur Arnórs rennur út eftir leiktíðina. Honum er því frjálst að ræða við önnur félög núna.
Arnór er tvítugur sóknarmaður. Hann kom til Fylkis í fyrra. Hann hafði áður verið í herbúðum Swansea þar sem hann lék með yngri liðum félagsins. Áður en hann fór til Wales var hann á mála hjá Blikum.
Arnór er hálfbróðir knattspyrnugoðsagnarinnar Eiðs Smára Guðjohnsen.