Ítalía vann öruggan sigur á Sviss í síðasta leik dagsins á EM 2020. Þeir eru nú öruggir með sæti í 16-liða úrslitum. Leikurinn var liður í A-riðli mótsins. Hann fór fram í Róm.
Ítalir voru betri aðilinn í fyrri hálfleik. Þeir héldu að þeir hefðu komist yfir á 19. mínútu þegar Giorgio Chiellini kom boltanum í netið. Myndbandsdómgæslan, VAR, sýndi þó fram á hendi í aðdraganda marksins og því stóð það ekki.
Manuel Locatelli tókst þó að koma Ítölum yfir á 26. mínútu eftir sendingu frá Domenico Berardi. Staðan í hálfleik var 1-0.
Locatelli var aftur á ferðinni á 52. mínútu með góðu marki eftir undirbúning Nicolo Barella. Ciro Immobile gulltryggði 3-0 sigur Ítalíu með marki á 89. mínútu.
Ítalir eru, sem fyrr segir, komnir í 16-liða úrslit. Öll lið A-riðils hafa leikið tvo leiki. Ítalir hafa sex stig, Wales fjögur, Sviss eitt og Tyrkland ekkert.