Segja má að mikil reiði sé í knattspyrnusamfélaginu í Noregi eftir viðtal við Vegard Forren leikmann Brann sem var sýnt á TV2 í gær.
Vegna kórónuveirufaraldursins eru flest viðtöl tekin í gegnum fjarfundabúnað og það var raunin með Forren.
Forren var mættur í viðtal við vinsælasta morgunþátt Noregs, þar var hann að ræða veðmálafíkn sem hann glímdi við.
Viðtalið sjálft var fróðlegt en skilaboð fyrir aftan Forren hafa vakið mikla reiði. „Kvennafótbolti, hvað er það? Það er ekki fótbolti og það eru ekki konur,“ stóð á bol fyrir aftan Forren sem hengdur var á vegginn.
Viðtalið var tekið á skrifstofu Dan Riisnes sem er markmannsþjálfari liðsins og ber hann ábyrgð á þessum bol og þeim skilaboðum sem á honum eru.
Brann hefur fengið mikla gagnrýni fyrir að leyfa skilaboð sem þessi á skrifstofu félagsins og kalla margir eftir því að einhver axli ábyrgð.