Ásgeir Börkur Ásgeirsson er mættur heim í Fylki eftir þrjú tímabil með HK í Kópavogi. Hann yfirgaf Fylki nokkuð óvænt haustið 2018 en hann segist hafa upplifað óvirðingu í sinn garð frá háttsettum mönnum í Árbæ.
Ásgeir Börkur segir frá málinu í fyrsta sinn í viðtali við Þorkel Mána Pétursson.
„Ég hef aldrei talað um þetta og hef kannski ekki verið spurður almennilega um þetta. Þetta snerist um óvirðingu, ég er alinn þannig að maður stendur fast á sínu,“ segir Ásgeir í þættinum Enn einn fótboltaþátturinn.
Ásgeir segist hafa upplifað óvirðingu og að honum hafi hreinlega verið ýtt til hliðar. „Þetta ár sem ég fór þá upplifði ég að það væri verið að ýta mér til hliðar, enginn virðing fyrir því sem ég hafði gert fyrir klúbbinn frá því ég var fjögurra ára.“
Ásgeir segist hafa fundið fyrir vanvirðingu frá bæði þjálfara liðsins og einum dáðasti syni Fylkis, Ólafi Inga Skúlasyni. ÓLafur hafði snúið heim úr atvinnumennsku eftir Heimsmeistaramótið í Rússlandi en þjálfari liðsins var Helgi Sigurðsson.
„Þetta var frá mörgum, það var frá þjálfaranum, manninum sem ég lét fá fyrirliðabandið þegar hann kom aftur, fólki sem ég taldi vini mína og var að vinna í kringum klúbbinn. Ég er bara þannig, virðing er mjög ofarlega í mínum huga. Ef að mér finnst brotið á mér á þeim vettvangi þá verð ég helvíti reiður.“
„Þetta var kannski ekki endirinn sem ég vildi hjá uppeldisklúbbnum. Fuck it, ég stóð á mínu.“
Ásgeir hélt áfram að þjálfa hjá Fylki en hann þurfti að hætta því skömmu síðar. „Það voru snillingar sem héldu að ég væri njósna um meistaraflokkinn.“
Eins og fyrr segir snéri Ásgeir aftur heim í Fylki í haust en mennirnir sem hann nefnir í sambandi við óvirðingu eru allir farnir frá félaginu.