Íslenska kvennalandsliðið í knattspyrnu fór auðvelt með það kýpverska í undankeppni HM 2023 í kvöld. Þetta var síðasti leikur kvennalandsliðsins á árinu. Leikið var í Kýpur.
Karólína Lea Vilhjálmsdóttir kom Íslendingum yfir með marki beint úr aukaspyrnu eftir átta mínútna leik. Ísland réði lögum og lofum á vellinum í fyrri hálfleik og bætti við öðru marki átta mínútum síðar. Brotið var á Berglindi Björgu Þorvaldsdóttur inn í vítateig kýpverska liðsins. Berglind fór sjálf á punktinn og skoraði af öryggi.
Sveindís Jane Jónsdóttir bætti við þriðja markinu á 37. mínútu eftir sendingu frá Karólínu Leu. Þetta var þriðja landsliðsmark Sveindísar í röð.
Ísland gerði nokkar breytingar á liðinu í seinni hálfleik. Hin 19 ára gamla Valskona Ída Marín Hermannsdóttir kom inn á í sínum fyrsta landsleik og Natasha Ansi, leikmaður Breiðabliks, kom inn á sínum fjórða.
Guðrún Arnardóttir bætti við fjórða markinu á 62. mínútu eftir sláarskot frá Karólínu Leu og þar við sat. 4-0 sigur Íslands staðreynd sem er í 2. sæti riðilsins með 9 stig, tveimur stigum á eftir toppliði Hollands sem hefur leikið einum leik fleiri. Kýpur situr á botninum með 1 stig. Efsta lið riðilsins fer beint áfram á HM en liðið sem endar í 2. sæti fer í umspil.
Kýpur 0 – 4 Ísland
0-1 Karólína Lea Vilhjálmsdóttir (‘8)
0-2 Berglind Björg Þorvaldsdóttir (’16)
0-3 Sveindís Jane Jónsdóttir (’37)
0-4 Guðrún Arnardóttir (’62)