Ísland vann öruggan 5-0 sigur á slöku liði Kýpur í undankeppni HM í kvöld. Þetta hafði Þorsteinn Halldórsson, þjálfari landsliðsins, að segja við RÚV eftir leik:

„Það er alltaf gott að vinna. Við komum í þessa tvo leiki til að vinna þá og þetta snerist um það. Við hefðum viljað vinna þennan leik stærra, hlutirnir gengu ekki alveg nógu vel hjá okkur á kafla í seinni hálfleik. En maður skammast sín ekkert fyrir 5-0 sigur,“ sagði Þorsteinn við RÚV.

Karolína skoraði mark í fyrri hálfleik sem var dæmt af á óskiljanlegan hátt. Fékk þjálfarateymið einhverjar skýringar á því?

„Nei, bara einhver hættulegur leikur hjá Svövu, það er eina skýringin. Ég er ekki búinn að sjá þetta aftur svo það er ekkert við þessu að segja núna þó að maður hafi verið pirraður þegar þetta gerðist.“

Nánast allir leikmenn hópsins fengu mínútur í þessu landsliðsverkefni.

„Já við lögðum þetta þannig upp ef þetta myndi ganga upp í fyrri leiknum að hræra svolítið í liðinu. Ég óttaðist það ekki neitt fyrir þennan leik, eins og kannski sást var ekkert að óttast. Við gerðum þetta vel í fyrri hálfleik en seinni hálfleikur var á köflum svolítið sloppy, kannski af því maður byrjaði að hræra svolítið mikið í liðinu. En heilt yfir er ég bara sáttur að flestir fengu fjölmargar mínútur.“

„Þessi leikur snerist bara um að við myndum mæta og klára þennan leik. Við höfum spilað betur en við erum ekki fúl yfir 5-0 sigri,“ sagði Þorsteinn að lokum við RÚV.