„Af hverju fóru þið ekki í Óla Kristjáns?,“ sagði Hjörvar Hafliðason stjórnandi Dr. Football í þætti sínum í dag. Þjálfaramálin í Garðabæ voru þar til umræður en Lúðvík Jónasson fyrrum leikmaður Stjörnunnar var gestur þáttarins.

Stjarnan hafði rætt við Ólaf Jóhannesson og Heimi Hallgrímsson um að taka við liðinu áður en Ágúst Gylfason var ráðinn til starfa.

Lúðvík er ekki hrifinn af Ólafi Kristjánssyni sem er án starfs. Ólafur er eini þjálfarinn í sögunni sem unnið hefur titla fyrir Breiðablik, þá hefur hann starfað erlendis síðustu ár og náð fínum árangri.

„Ég held að prófessorinn (Ólafur Kristjánsson) sé ekki vinsæll í Mónakó. Ég held að hann henti ekki ,ég hef enga trú á honum sem þjálfara. Hann er fínn í sjónvarpinu, ég hef setið með honum á þjálfaranámskeiði. Það vellur upp úr honum vitleysan þar,“ sagði Lúðvík en Ólafur var síðast þjálfari FH hér á landi.

Viðræður Stjörnunnar og Heimis voru mikið í fréttum. „Ég held að það sé út af því að Heimir vill hafa klásúlu. Hann vill komast erlendis, þú getur ekki tekið þjálfara og svo fær Heimir starf. Svo fengi hann starf í mars, apríl eða maí. Korter í mót, það gengur ekki upp,“ sagði Lúðvík um stöðuna.

Þjálfaraleit Stjörnunnar var mikið í fréttum og margir voru orðaðir við starfið. „Það er ekkert mikið á markaðnum, Óli Kristjáns var þar. Jón Þór samdi við Vestra, ég held að Jón hafi verið ofarlega á blaði en þegar þeir voru í viðræðum við Heimi þá stökk hann á Vestra,“ sagði Lúðvík um Jón Þór Hauksson og aðra sem voru nefndir til sögunnar.