Enska knattspyrnufélagið Arsenal hefur gert samning við hinn fimm ára gamla Zayn Ali Salman, sem hefur slegið í gegn í netheimum undanfarna daga.

Myndbönd af Zayn vera að leika listir sínar með bolta hafa farið eins og eldur um sinu á samfélagsmiðlum og hefur hann hlotið viðurnefnið ‘litli Messi’.

Arsenal byrjaði að fylgjast með Zayn eftir ábendingu frá hans gamla þjálfara Austin Schofield. ,,Við settum hann í hóp með krökkum á aldrinum 5-6 ára og hann var langt um betri en krakkar á þeim aldri. Hraðari en þeir, boltaleikni hans var betri og það hvernig hann sparkaði í bolta og sendi hann frá sér var bara mun betra en við höfum séð hjá krökkum á hans aldri,“ sagði Schofield í viðtali við BBC News.

Zayn vakti fljótlega áhuga hjá njósnurum Arsenal. ,,Þessi strákur var að framkvæma hluti sem ætti ekki að vera mögulegt fyrir hann að framkvæma. Ég hringdi í vinn minn sem sagði hann vera fjögurra ára og ég trúði honum ekki, það var ekki möguleiki fyrir mig að ímynda mér að hann væri enn í leikskóla,“ sagði Stephen Deans, njósnari hjá Arsenal.

Faðir Zayns, segist hafa tekið eftir því fljótlega eftir fæðingu að strákurinn væri sérstakur. ,,Ljósmóðirinn lét hann liggja á maganum fljótlega eftir fæðingu og hann lyfti bara hausnum upp og fór að horfa í kringum sig. Hún var í sjokki en við gátum séð að hann var mjög sterkur strax frá unga aldri og það lagði grundvöllinn að því sem við erum nú að sjá,“ sagði faðir Zayns í viðtali við BBC News.