Jón Þór Hauksson verður áfram þjálfari Lengjudeildarliðs Vestra og mun skrifa undir nýjan tveggja ára samning við félagið. Þetta herma heimildir 433.is að vestan.

Jón Þór samdi við Vestra í júlí á þessu ári og gerði samning út nýafstaðið tímabil. Hann tók við liðinu er það var í 6. sæti Lengjudeildarinnar og skilaði því í 5. sæti í lok tímabils. Þá komst Vestri einnig í undanúrslit Mjólkurbikarsins þar sem liðið lagði til að mynda þáverandi Íslandsmeistara Vals að velli. Undir stjórn Jóns Þórs vann Vestri átta leiki af fjórtán.

Það er ljóst að um mikinn hvalreka er að ræða fyrir Vestra en Jón Þór hefur verið orðaður við störf í efstu deild síðustu vikur.

Jón Þór hafði verið orðaður við starf hjá karlaliði Stjörnunnar í Pepsi-Max deildinni en nú er ljóst að Ágúst Gylfason verður næsti þjálfari liðsins.