Vanda Sigurgeirsdóttir, formaður Knattspyrnusambands Íslands er gestur í þættinum 433.is sem verður sýndur á sjónvarpsstöðinni Hringbraut klukkan 20:00 í kvöld.
Það var mikið ákall, þegar að Guðni Bergsson lét af störfum sem formaður Knattspyrnusambands Íslands á sínum tíma að Klara Bjartmarz, framkvæmdastjóri sambandsins myndi gera það líka.
Vanda hefur ekki gert kröfu um að Klara segi af sér heldur hefur hún lýst yfir stuðningi við hana. Henni finnst ekki hægt að setja starfsmenn og kjörna fulltrúa undir sama hatt.
„Mér finnst himinn og haf þarna á milli. Klara er bara starfsmaður í stéttarfélagi og mér hefði fundist það mjög óábyrgt ef að við hefðum mætt þarna inn sem ný stjórn og byrjað á því að reka hana eða einhverja aðra.“
„Atriði númer eitt í krísustjórnun er að byrja á því að afla sér upplýsinga og þegar ég labba þarna inn þá er ég ekki með neinar upplýsingar, ég veit ekkert hvað gekk á. Mér hefði fundist það út í hött, óábyrgt og ósanngjarnt. Það vildi ég alls ekki gera (að reka Klöru). Við erum að safna upplýsingum og það er nefnd að skoða þetta. Óháð nefnd sem er að skoða hvað gerðist.“
Hægt verður að horfa á viðtalið við Vöndu Sigurgeirsdóttur í fullri lengd í þættinum 433.is á Hringbraut í kvöld klukkan 20:00.