Forráðamenn tyrkneska félagsins Fenerbache, biðla til stuðningsmanna liðsins að leggja félaginu lið í því verkefni að eiga fyrir launapakka Mesut Özil, með því að senda inn sms-áheit.

Özil er við það að ganga til liðs við liðið eftir að hafa samið við Arsenal um riftun á samningi sínum þar. Launapakki Özil í heildina á samningstímanum við Fenerbache eru rúmar 13 milljónir punda.

Forseti félagsins biðlar til stuðningsmanna um sms-áheit þar sem að ágóðinn færi í það að eiga fyrir launum Özil.

„Við erum með beiðni til stuðningsmanna okkar. Haldið áfram að styðja okkur, við reiðum okkur einnig á ykkar fjárhagsstuðning,“ sagði Ali Koc, forseti Fenerbache.

Ali vill að stuðningsmenn slá met með fjölda sms-áheita í átakinu sem hefur fengið heitið Mesutol. Hvert sms mun kosta í kringum 2 pund.

Fenerbache er skuldum vafið félag, Daily Mail, greinir frá því að tyrkneska félagið sé að glíma við skuldir sem nema rúmum 460 milljónum punda.

Özil mun gera þriggja og hálfs árs samning við tyrkneska félagið og heimildir herma að hann muni vera á töluvert lakari launum en hann var á hjá Arsenal.

Vikulaun Özil  hjá Arsenal voru í kringum 350.000 pund á viku en þau verða um 67.300 pund á viku hjá Fenerbache.

Özil spilaði ekkert með Arsenal á tímabilinu, síðasti leikur hans fyrir enska félagið var í mars árið 2020. Hann hefur verið utan hóps í öllum helstu keppnum sem félagið tekur þátt í. Hann var ekki í áætlunum Mikel Arteta, knattspyrnustjóra félagsins.