Mark Clattenburg, fyrrverandi knattspyrnudómari í ensku úrvalsdeildinni segist sjá í gegnum þá afvegaleiðingu Jurgen Klopp, knattspyrnustjóra Liverpool um að hann nýti sér ekki hugarleiki gegn andstæðingum sínum fyrir leiki.
Jurgen Klopp, segist ekki hafa þá færni sem þarf til að spila slíka leiki. Mark Clattenburg svarar þessum fullyrðingum Klopp í pistli sem birtist í Daily Mail.
„Þannig þetta er þá sami Klopp og við sjáum stara á upphitun andstæðinganna fyrir leiki?“ spyr Clattenburg í pistli sínum.
Clattenburg, telur að Klopp sé ekki að gefa sér nógu mikið hrós fyrir þessa færni sína í hugarleikjum. Hann viti alveg nákvæmlega hvað hann er að gera og þess vegna sé hann einn besti knattspyrnustjórinn í ensku úrvalsdeildinni frá upphafi.
Clattenburg og Klopp hafa átt í samskiptum í gegnum pistla og viðtöl á síðustu dögum. Sá fyrrnefndi nefndi það í pistli á fimmtudaginn að Klopp væri að leika hugarleiki með því að benda á þann fjölda vítaspyrna sem Manchester United hefur fengið undanfarið.
Clattenburg sagði þá að slíkir hugarleikir hefðu ekki sést síðan að Sir Alex Ferguson var knattspyrnustjóri Manchester United. Klopp svaraði þessum skrifum Clattenburg með því að segja „Ég er ekki Sir Alex.“
Liverpool og Manchester United mætast í toppslag ensku úrvalsdeildarinnar á morgun.
