Wayne Rooney, fyrrverandi leikmaður liða á borð við Everton og Manchester United, hefur lagt knattspyrnuskóna á hilluna og snúið sér að þjálfun þar sem hann hefur verið ráðinn þjálfari Derby County.

Hinn 35 ára gamli Wayne Rooney, á að baki magnaðan knattspyrnuferil. Hann er sem stendur markahæsti leikmaðurinn í sögu enska landsliðsins en hann skoraði 53 mörk fyrir England 120 leikjum.

Þá er Rooney einnig markahæsti leikmaðurinn í sögu Manchester United þar sem hann skoraði 253 mörk.

Rooney var 16 ára og 360 daga gamall þegar hann skoraði sitt fyrsta mark í ensku úrvalsdeildinni með Everton gegn Arsenal í október árið 2002.

„Munið nafnið, Wayne Rooney!“ sagði lýsandinn er Wayne Rooney tryggði Everton 2-1 sigur á Arsenal. Það leið ekki á löngu þar til allir þekktu nafnið.

Á sínum tíma með Everton lék Rooney 117 leiki, skoraði 28 mörk og gaf 4 stoðsendingar. Þessi ungi og kraftmikli framherji vakti mikla athygli með frammistöðu sinni hjá Everton og var árið 2004 keyptur til Manchester United fyrir 26 milljónir punda.

Hjá Manchester United varð Ronney sigursæll undir stjórn Sir Alex Ferguson. Hann varð Englandsmeistari fimm sinnum, vann Meistaradeild Evrópu og varð enskur bikarmeistari.

Hann skrifaði sig í sögubækur félagsins og er hingað til eini leikmaðurinn í sögu félagsins sem hefur skorað meira en 250 mörk.

Eftir 13 ára feril hjá Manchester United sneri hann aftur heim til Everton þar sem hann lék í eitt tímabil, spilaði 31 leik og skoraði tíu mörk. Í kjölfarið tók síðan við tími í Bandaríkjunum með D.C. United og á Englandi með enska B-deildar liðinu Derby County.

Í nóvember á síðasta ári var Rooney síðan ráðinn bráðabirgðastjóri Derby County eftir að þáverandi þjálfara félagsins, Philip Cocu, hafði verið sagt upp störfum. Rooney hefur nú ákveðið að snúa sér alfarið að þjálfun og samdi við Derby um að verða næsti knattspyrnustjóri félagsins.

Þar með líkur leikmannaferli eins helsta markaskorara Englands.

Enski boltinn á 433 er í boði