Aftaka veðurspá er fyrir laugardaginn þegar síðasta umferðin í efstu deild karla á að fara fram. Víkingur og Breiðablik berjast um sigur í deildinni og þrjú félög geta enn fallið.

Um allt land er vond veðurspá en spáin á föstudag er miklu betri eins og staðan er í dag. Starfsmenn KSÍ fylgjast vel með veðurspánni en bíða og sjá hvað verður.

„Við fylgjumst með, það verða engar ákvarðanir teknar í dag um neitt,“ sagði Birkir Sveinsson sem er með yfirstjórn yfir móta- og dómaramálum hjá KSÍ.

Spáin fyrir föstudag er góð en á sunnudag er spáð vondu veðri þó spáin sé mikið mun betri en á laugardag.

Birkir segist ekki útiloka það að leikirnir verði færðir og þá mögulega til föstudags. „Ég ætla ekki að útiloka neitt, við erum að fylgjast. Það er ekki hægt að að taka ákvörðun í dag um veðurspá sem er fyrir laugardaginn,“ sagði Birkir. Líklega verður málið skoðað betur á morgun.