Víkingur Ólafsvík hefur átt virkilega erfitt tímabil í Lengjudeildinni í ár. Liðið var til umræðu í markaþætti Lengjudeildarinnar á Hringbraut í gærkvöldi.
Víkingur er á botni deildarinnar með aðeins 2 stig eftir ellefu leiki. Liðið er 7 stigum frá öruggu sæti.
Guðjón Þórðarson tók við liðinu af Gunnari Einarssyni á dögunum. Hörður Snævar Jónsson, þáttastjórnandi og Kristján Óli Sigurðsson, sérfræðingur, voru sammála um það að bætingu mætti sjá á liðinu eftir komu Guðjóns. Þrátt fyrir það sé þó líklega ómögulegt að bjarga liðinu frá falli.
,,Þetta er nánast ómögulegt verkefni og Gaui veit það held ég sjálfur, enda samdi hann út næstu leiktíð. Það er sennilega hugsunin að koma liðinu rakleiðis aftur upp í leiktíðina,“ sagði Kristján Óli í þættinum.
Víkingur Ó. gerði grátlegt jafntefli við Grindavík í síðustu umferð Lengjudeildarinnar. Þá missti liðið leikinn í 2-2 jafntefli í uppbótartíma.
Umræðuna um Víking Ó. sem og markaþátt Lengjudeildarinnar í heild sinni má sjá hér fyrir neðan.