Ítalía vann öruggan sigur á Tyrklandi í fyrsta leik Evrópumótsins. Leikið var í Rómarborg.

Ítalska liðið var með yfirhöndina í fyrri hálfleik, var miklu betra en náði nó ekki að búa sér til nægilega góð færi. Þá lá tyrkneska liðið til baka án þess að komast nálægt því að gera sig líklegt fram á við. Staðan í hálfleik var markalaus.

Ítalir fundu þó fyrsta markið á 53. mínútu. Þá skoraði Merih Demiral sjálfsmark er hann stýrði fyrirgjöf Domenico Berardi í eigð net.

Yfirburðir Ítala héldu áfram og Ciro Immobile tvöfaldaði forystu þeirra á 66. mínútu. Hann fylgdi þá eftir skoti Leonardo Spinazzola og skoraði.

Lorenzo Insigne skoraði svo þriðja mark lærisveina Roberto Mancini eftir sendingu frá Immobile. Lokatölur 3-0.

Sterk byrjun hjá Ítalíu sem er þá komið með þrjú stig á töfluna í A-riðli. Sviss og Wales eru einnig í riðlinum. Þau leika á morgun.