Benedikt Bóas Hinriksson blaðamaður á Fréttablaðinu var með æluna upp í háls þegar hann horfði á sjónvarp sitt um helgina, Benedikt var þá að horfa á leik í efstu deild karla í knattspyrnu.
Benedikt fór yfir málið í sjónvarpsþætti 433 sem frumsýndur var á Hringbraut í gær og þar fengu markmannsþjálfarar, vörubílstjórar og fleiri að finna fyrir því.
„Ég gubbaði aðeins upp í mig þegar ég horfði á Fylkir – Stjarnan. Ég sá mark Stjörnunnar og hvernig það kom, aukaspyrna 40 metrum frá teignum, það er ekki einu sinni þrumað inn í teig. Gamli góði fallhlífar boltinn, ég taldi niður 10,9,8,7 og las síðan Fréttablaðið. Ég var komin í mitt blað þegar ég leit upp og sá að það var skallað og markmaðurinn var á línunni, þetta var afskaplega lélegt. Það er ekkert hægt að fegra það, það er hægt að æfa þetta,“ sagði Benedikt ómyrkur í máli en ummæli hans má sjá hér að neðan.
Benedikt hefur áhyggjur af stöðu markvarða á Íslandi, hann telur einnig að íslenskir markmannsþjálfarar séu ekki starfi sínu vaxnir.
„Markmaðurinn getur staðið framar, þú getur ekki kennt hugrekki en getur kennt hvað á að gera. Það eru sjö umferðir búnar, þetta er maður búinn að sjá. Markmenn á Íslandi eru ekki á góðum stað, þá fer maður að velta fyrir sér markmannsþjálfun. Er hún ekki bara svona og meirapróf í umferðinni, þeir sem eru að kenna meirapróf hljóta að vera lélegustu kennarar í heimi. Það hlýtur að vera, það er ekki til góður bílstjóri á flutninga eða vörubíl á Íslandi,“ sagði Benedikt.
„Það eru búin að vera nokkur augnablik í þessum umferðum, þar sem maður sér og hugsar hvort það sé ekki verið að kenna þeim eitt eða neitt.“
Markmannsþjálfarar þurfa að vera til taks í leyfiskerfi KSÍ en Benedikt telur að breyta þurfi til á flestum stöðum. „Það er ekkert sem segir mér að þetta sé búið að vera í leyfiskerfinu í nokkur ár, það er komin ágætis reynsla á markmannsþjálfara. Á þessum COVID tímum þar sem þú þarft að telja hverja krónu, burt með þessa menn eða ráða nýja.“