Leicester City tók á móti Manchester United í 8-liða úrslitum enska bikarsins í gær. Leiknum lauk með 3-1 sigri Leicester en leikið var á heimavelli liðsins, King Power Stadium. Kelechi Iheanacho, kom Leicester yfir með marki á 24. mínútu.

Þannig stóðu leikar þar til á 38. mínútu þegar að Mason Greenwood jafnaði metin fyrir Manchester United með marki eftir stoðsendingu frá Paul Pogba. Youri Tielemans kom Leicester aftur yfir í leiknum á 52. mínútu og það var síðan Kelechi Iheanacho sem innsiglaði 3-1 sigur Leicester með sínu öðru marki í leiknum á 78. mínútu.

Leicester er því komið áfram í undanúrslit bikarsins en Manchester United er úr leik. Bruno Fernandes var einn af þeim sem settur var á bekkinn í leiknum, hefur Ole Gunnar Solskjær fengið gagnrýni fyrir það.

„Það er ástæða fyrir öllu þegar þú velur liðið, Bruno hefur spilað rosalega mikinn fótbolta. Hann setti met í hlaupum og átökum á fimmtudag, hann er mannlegur,“ sagði Solskjær.

„Hann hefur spilað alla leiki, á þriggja eða fjögurra daga fresti. Þetta var tækifæri til að byrja bæði Donny og Paul. Við höfum spilað marga leiki.“

„Bruno vill spila alla leiki en stundum tekur þú ákvörðun um svona hluti.“