Luke Shaw bakvörður Manchester United hefur heldur betur spilað vel síðustu vikur og mánuði. Bakvörðurinn var í klípu og virtist ekki eiga neina framtíð hjá félaginu.
Ole Gunnar Solskjær hefur hins vegar tekist að ná því besta fram úr bakverðinum, Shaw var keyptur til United sumarið 2014. Hann var framan af ferli sínum mikið meiddur og þá var hann oft sagður í lélegu formi.
Á þessu tímabili hefur Shaw sprungið út og verið einn allra besti og mikilvægasti leikmaður United. Ole Gunnar Solskjær er með kenningu um af hverju Shaw hefur sprungið svona út.
„Hann æðir fram völlinn og hann treystir sjálfum sér. Hann var faðir og það breytir miklu fyrir marga,“ sagði Solskjær og telur að föðurhlutverkið hafi orðið til þess að Shaw tekur meiri ábyrgð í lífinu.
Solskjær hefur stýrt United í tæp tvö og hálft ár. „Luke hefur þroskast svo mikið á þessum tíma. Ég elska að sjá bætinguna hans.“
„Hann er 25 ára, hann er að verða að karlmanni. Hann er einn af reyndari strákunum í okkar liði.“
