„Þeir taka ábyrgð á þessu sem þetta gjörðu,“ segir Geir Þorsteinsson við Vísir.is en hann ákvað á síðustu stundu að hætta við framboð sitt til formanns ÍTF í gær.

Orri Hlöðversson er nýr formaður ÍTF, hagsmunasamtaka liða í tveimur efstu deildum fótboltans á Íslandi. Var hann kjörinn formaður á stjórnarfundi í gær.

Allt stefndi í spennandi kosningabaráttu en Geir Þorsteinsson, fyrrum formaður KSÍ bauð sig einnig fram.

Óvissa var um hvort Orri sem er formaður knattspyrnudeildar Breiðabliks fengi að fara fram. Ástæðan var sú að aðeins einn frá hverju félagi má sitja í stjórn ÍTF. Breiðablik átti fyrir fulltrúa þar sem átti ár eftir í stjórninni. Stjórn ÍTF þarf að boða til annars fundar til að manna stjórn sína.

Sá aðili steig til hliðar á fundinum í gær en Geir er klár á því að það sé ólöglegt, umræddur maður var kjörinn til tveggja ára. En meirihluti aðalfundar ÍTF samþykkti þessi áform og þá ákvað Geir að hætta við. „Ég sagði bara að ef fundurinn gengi gegn samþykktum samtakanna þá yrði ég ekki með í þessu lengur. Ég ætlaði ekki að taka þátt í að samþykkja þessa lögleysu,“ segir Geir við Vísir.is.

Geir veit ekki hvaða afleiðingar málið hefur. „Ég get ekkert sagt um hvaða afleiðingar þetta hefur. Það á bara eftir að koma í ljós. Stjórnin er að mínu mati ólöglega skipuð, og það byggi ég á því sem lögfræðingur segir.“