Julian Knight stjórnmálamaður í Bretlandi er allt annað en sáttur með knattspyrnumenn þar í landi og þá staðreynd að þeir eiga í vandræðum með að fylgja reglum.
Stíf fundarhöld verða hjá ensku úrvalsdeildinni í dag og á morgun en fundað verður með fyrirliðum, stjórum og lykil starfsfólki vegna COVID-19 ástandsins.
Ástæðan eru hertar reglur sem deildin hefur lagt til vegna veirunnar. Útgöngubann ríkir í Bretlandi vegna kórónuveirunnar en ástandið þar er slæmt, atvinnumenn í íþróttum fá hins vegar að halda áfram starfi sínu. Á dögunum setti enska úrvalsdeildin fram nýjar reglur og þar sem kom fram að leikmenn ættu ekki að fallast í faðma þegar mörkum væri fagnað.
Erfiðlega gengur fyrir leikmenn að skilja þessa einföldu reglu og mátti ítrekað sjá leikmenn faðmast um helgina í enska bikarnum og í ensku úrvalsdeildinni í vikunni.
„Þetta eru fyrirmyndir, það er heilalaust af þeim að fara ekki eftir reglum um fjarlægð og slíkt þegar neyðarástand er í landinu. Þetta er mjög slæmt,“ sagði Knight um stöðu mála en íþróttir hafa fengið undanþágu frá reglum, útgöngubann er í landinu.
„Fólkið sem starfar í framlínu er að setja líf sitt í hættu og svo haga þeir sér svona. Knattspyrnumenn hafa áhrif og þeir ættu að hjálpa heilbrigðiskerfinu og ítreka reglurnar fyrir fólki. Þeir ættu að nota sína rödd.“