Ein óvæntustu úrslit enska bikarsins um helgina var þegar Crawley Town úr fjórðu efstu deild vann sigur á Leeds, sem leikur í efstu deild.
Nick Tsaroulla skoraði eitt marka Crawley í 3-0 sigri liðsins en hann brast í grát að leik loknum. Fyrir því er þó góð ástæða en þessi 21 árs gamli leikmaður hefur upplifað erfiðleika síðustu ár.
Draumur hans um að spila fyrir Tottenham varð að engu þegar hann lenti í alvarlegu bílslysi árið 2017, skömmu síðar var honum tjáð að félagið myndi ekki endurnýja samning hans. Draumur Tsaroulla var þar tekinn af honum en hann hafði frá 12 ára aldri spilað fyrir félagið.
Tsaroulla gekk í raðir Brentford og var í varaliðinu þar en meiðslin eftir bílslysið gerði honum erfitt fyrir, félagið lét hann fara og þessi 21 árs piltur samdi við Crawley.
Markið gegn Leeds var hans fyrsta á ferlinum og hann brast í grát þegar hann ræddi við BBC eftir leikinn. „Þetta hefur verið löng vegferð fyrir mig, mjög erfið vegferð. Ég er hrikalega stoltur,“ sagði Tsaroulla.
„Ég er að bresta í grát, þetta hefur verið svo erfið leið og þetta er mér svo mikilvægt. Þetta mark og þessi sigur.“
Enski boltinn á 433 er í boði 
