Lengjudeild kvenna er í biðstöðu eins og öll knattspyrna á Íslandi, vegna Covid-19. Öllum leikjum hefur verið frestað til 5. ágúst þegar staðan verður endurmetin. Að sjö umferðum loknum er Keflavík í efsta sæti með 17 stig og Tindastóll er í öðru sæti með 16 stig.
Nokkrir leikmenn standa öðrum framar þegar kemur að markaskorun. Dröfn Einarsdóttir hjá Keflavík hefur skorað flest mörk hingað til, sex talsins. Þrjár hafa skorað fimm mörk. Vienna Behnke Haukum, Murielle Tiernan Tindastól og Natasha Moraa Anasi Keflavík. Þórhildur Þórhallsdóttir leikmaður Augnabliks og Stefanía Ásta Tryggvadóttir leikmaður Víkings hafa skorað fjögur mörk hvor.
Búast má við frekari upplýsingum frá KSÍ í síðasta lagi á morgun varðandi framhaldið í íslenska boltanum.
KSÍ hefur gefið frá sér reglugerð þar sem meðal annars kemur fram að 2/3 hlutar Íslandsmótsins verða að vera búnir til að hægt sé að krýna Íslandsmeistara. Sama gildir um færslu liða á milli deilda. Mótið þarf að vera búið fyrir 1. desember.