Hjörvar Hafliðason, stjórnandi þáttarins, spurði hvers vegna það er verið að blása allt af í íslenska boltanum. Kristján Óli Sigurðsson, spekingur þáttarins, svarar honum og en hann er ekki þekktur fyrir að liggja á skoðunum sínum. „Það er ekkert að gerast og ég bara skil ekki hvað er í gangi varðandi það að blása fótboltann af þegar allt annað má vera í gangi,“ sagði Kristján. „Veitingastaðir mega vera opnir til 23, þú mátt vera í sleik við einhvern niðri í 101 Reykjavík til klukkan 23 á kvöldin svo þarftu að fara heim og allt í góðu.“
Kristján virðist þó hafa gleymt tveggja metra reglunni sem er í gildi þessa stundina og ætti hún að koma í veg fyrir sleiki á djamminu. Þó er það skiljanlegt að pirringur sé hjá Kristjáni yfir því að svo hart sé tekið á knattspyrnunni þegar sóttvarnir eru ekki efst í huga allra landsmanna.
Þá kom Kristján með dæmi úr íslensku knattspyrnunni til að sýna hversu „sáralitlar líkur“ eru á því að smit komi upp í fótboltanum. „Sjáðu bara dæmin, það var allt stoppað í kvennaboltanum þegar Breiðabliks-stelpan var smituð, Selfoss og Breiðablik fóru í sóttkví. Hún smitaði engan, hún spilaði við þessar stelpur, smitaði engan hvorki á æfingum né í leikjum,“ sagði Kristján. Þá nefndi hann einnig Þorra Geir, leikmann Stjörnunnar, en hann var smitaður og fór lið Stjörnunnar í sóttkví í kjölfarið.
„En ekki einn maður smitaðist í Stjörnunni af honum. Þetta gerðist í einhverjum partýjum, af hverju eru ekki partý bönnuð og fótbolti leyfður? Drullastu í gang Þórólfur eða ég fer og læri sóttvarnarlækninn,“ sagði Kristján að lokum. „Þetta er reyndar það besta sem ég hef heyrt í þessu,“ sagði Hjörvar þá.
Hlaðvarpsþáttinn í heild sinni má sjá hér fyrir neðan: