Þegar einungis 4 mínútur voru liðnar af leiknum náði Bayern að komast yfir eftir mark frá Thomas Müller. Örfáum mínútum seinna skoraði David Alaba, varnarmaður Bayern, sjálfsmark og jafnaði um leið leikinn. Bayern ætlaði þó ekki að láta sjálfsmark skipta máli og gerði liðið sér lítið fyrir og skoraði þrjú önnur mörk áður en blásið var til hálfleiks.
Á 57. mínútu náði Luis Suarez að minnka muninn fyrir Barcelona en því miður fyrir spænska liðið þá átti þetta eftir að vera síðasta mark liðsins í kvöld. Bayern var hins vegar langt frá því að hætta að skora. Joshua Kimmich kom liðinu aftur í þriggja marka forystu og Robert Lewandowski jók forystuna enn meira með marki á 82. mínútu. Phillipe Coutinho, sem hefur ekki alveg náð fótfestu í Bayern liðinu síðan hann fór þangað frá Barcelona, gerði sér lítið fyrir og skoraði tvö mörk á 5 mínútum. Til gamans má geta að hann átti einnig stoðsendinguna í marki Lewandowski.
Lokaniðurstaðan 2-8 fyrir Bayern Munchen sem flýgur inn í undanúrslitin en Barcelona menn fara heim til Spánar og hugsa sinn gang. Þessi leikur gæti hafa fyllt mælinn hjá stjórn Barcelona og gæti Quique Setién, þjálfari liðsins, átt von á því að fjúka.