Inter Miami hefur ekki farið vel af stað en liðið hefur tapað öllum sex leikjunum sínum. Það virðist ekki stoppa Beckham í að vilja sækja stjörnur til Evrópu. Hann hefur eflaust séð áhrifin sem Zlatan Ibrahimovic hafði á LA Galaxy og vonast nú til þess að Suarez geti gert það sama í Miami.
Þá gæti Suarez einnig verið góður kostur þar sem stór hluti íbúa í Miami koma frá Suður-Ameríku. Suarez er frá Úrúgvæ og gæti hann því heillað fólkið á svæðinu ef hann fer til Inter Miami.
Suarez er einnig sagður hafa áhuga á því að fara til Bandaríkjanna. „Maður veit aldrei. Ég er samningsbundinn Barcelona en MLS er flott deild. Bandaríkin gætu verið góður valmöguleiki,“ sagði Suarez nýlega. Nico Lodeiro, liðsfélagi Suarez í landsliðinu og spilar með Seattle Sounders í MLS-deildinni, sagði í fyrra að Suarez vilji koma í MLS-deildina. „Hann er alltaf að spyrja mig út í deildina. Það er ekki spurning um hvort heldur hvenær hann kemur hingað.“