Elísabet Gunnarsdóttir þjálfari Kristanstad í Svíþjóð þarf að taka sér frí frá þjálfun um óákveðinn tíma vegna veikinda. Elísabet er með taugasjúkdóm en óvíst er hvenær hún getur snúið aftur á hliðarlínuna.
Sjúkdómur Elísabetar nefnist ristill. „Þetta er veirusjúkdómur sem allir sem hafa fengið hlaupabólu geta fengið,“ sagði Elísabet í samtali við Morgunblaðið.
Elísabet fær ótrúlega verki í vinstri hlið líkamans og er inn og út af spítala. „Þetta lýsir sér fyrst og fremst þannig að ég er bara með bilaða verki, bæði í höfðinu og hálsinum, og alltaf í vinstri hlið líkamans. Hægri hliðin er því fullfrísk, sem er stórfurðulegt. Ég var svo bara inn og út af spítala í einhverja fjóra daga og það fann enginn neitt út úr því sem var að angra mig. Ég gat ekki legið á höfðinu sem dæmi og svaf þess vegna lítið sem ekkert á næturnar. Svo byrja að myndast einhverjar blöðrur á höfðinu á mér og þá átta læknarnir sig á því hvað það er sem er að hrjá mig,“ sagði Elísabet.
Til að gera vonda stöðu verri fékk Elísabet ranga sjúkdómagreiningu og óvíst er hvenær hún kemst aftur á völlinn.
„Vandamálið í þessu öllu saman er að ég fékk ranga sjúkdómsgreiningu til að byrja með og var fyrst sett á pensilín. Vandamálið með svona ristil er að maður þarf að fá rétta meðhöndlun og rétt lyf innan 72 klukkustunda frá því að sjúkdómurinn skýtur upp kollinum til þess að sleppa við þessa taugaverki. Ég fæ svo ekki rétt lyf fyrr en nokkrum dögum síðar og það gerir það að verkum að þessir verkir hafa verið alveg svakalega sárir. Ég er komin á flogaveikilyf núna sem eiga að vinna á þessu og nú er bara að bíða og sjá hversu langan tíma þetta mun taka að jafna sig,“ sagði Elísabet við Bjarna Helgason á Morgunblaðinu.