Jack Grealish miðjumaður Aston Villa sér eftir því að hafa dottið í það og brotið reglur um útgöngubann á Englandi.

Grealish komst í fréttirnar eftir að hafa farið í partý, keyrt fullur og flúið af vettvangi.

Miðjumaðurinn er spenntur fyrir því að snúa aftur á völlinn þann 17 júní en mun þó sakna þess að láta baula á sig. „Ég elska að láta hrauna yfir mig, ég man vel eftir því að Cristiano Ronaldo var eins þegar hann mætti á Villa Park þegar ég var krakki. Ég er ekki að líkja okkur saman,“ sagði Grealish.

„Það kveikti í honum og ég reyni að nýta þetta eins, ég nýti hatrið til að spila vel.“

Um atvikið þar sem hann braut útgöngubannið hafði Grealish þetta að segja. „Ég vissi um leið að ég yrði að biðjast afsökunar, ég vildi gera það. Ég vildi ekki fela mig á bak við yfirlýsingu félagsins,“ sagði Grealish.

„Ég veit að ég er knattspyrnumaður en ég er líka manneskja, við gerum öll mistök og ég vissi um leið að þetta var ekki rétt.“

„Ég er fyrirmynd fyrir marga krakka þarna og þau horfa upp til mín.“