Það vakti mikla athygli í gær þegar Jóhannes Kristinn Bjarnason, 15 ára drengur lék sinn fyrsta leik með KR. Jóhannes kemur af miklum knattspyrnuættum en faðir hans er Bjarni Guðjónsson fyrrum atvinnumaður í knattspyrnu og afi hans er Guðjón Þórðarson einn öflugasti þjálfari sem Ísland hefur átt.
Ótrúleg knattspyrnuætt sem tengir sig nú í nokkra ættliði í gegnum syni Guðjóns og þar í kring.
Allt þetta hófst þegar Þórður Guðjónsson fæddist á Ökrum á Akranesi 10. október 1923 en Þórður kvæntist 1. júní 1951 Marselíu Guðjónsdóttur frá Hreppsendaá í Ólafsfirði. Saman eignuðust þau nokkur börn og þar á meðal Guðjón Þórðarson sem fæddist árið 1955.
Guðjón á svo fjóra syni sem hafa látið af sér kveða í fótboltanum hér heima og þrír af þeim erlendis og með íslenska landsliðinu. Bjarni og Jóhannes Karl eiga svo báðir unga syni sem eru byrjaðir að skapa sér nafn. Að auki er landsliðsmaðurinn Björn Bergmann Sigurðarson hálfbróðir Þórðar, Bjarna og Jóa Kalla.
Guðjón Þórðarson
Einn færasti þjálfari í sögu Íslands átti farsælan feril sem leikmaður áður en hann snéri sér að þjálfun. Hann vann deildina með KA og ÍA hér á landi áður en hann tók við KR og vann bikarinn þar. Guðjón átti svo farsælan feril sem þjálfari erlendis.
Þórður Guðjónsson
Kantmaðurinn knái átti frábæran feril sem leikmaður en hann fór með pabba sínum til KA áður en hann snéri aftur til ÍA. Þórður átti farsælan þrettán ára feril í atvinnumennsku áður en hann snéri aftur heim. Þórður lék tæplega 60 A-landsleiki fyrir Íslands.
Bjarni Guðjónsson
Einn besti miðjumaður sem efsta deild á Íslandi hefur séð, Bjarni átti frábæran feril hér heima með ÍA og KR. Hann lék í níu ár erlendis en stórlið Newcastle fékk hann til félagsins árið 1997 þegar Bjarni var aðeins 18 ára gamall. Bjarni lék 23 A-landsleiki en hann er í dag aðstoðarþjálfari KR
Jóhannes Karl Guðjónsson
Jóhannes Karl lék með ÍA og KA hér heima áður en hann hélt til Belgíu en hann var í 14 ár í atvinnumennsku og náði langt á Englandi með Leicester, Burnley, Aston Villa, Wolves og Huddersfield. Þá lék hann með Real Betis í La Liga. Jóhannes lék rúmlega 30 landsleiki fyrir Íslands og er í dag þjálfari ÍA.
Atli Guðjónsson
Atli er fæddur árið 1988 en hann á ekki sömu móðir og Þórður, Bjarni og Jóhannes. Atli lék alla tíð á Íslandi en lagði skóna á hiluna árið 2017. Hann lék með ÍA þegar faðir hans Guðjón var þjálfari en einnig spilaði hann fyrir ÍBV, ÍR og BÍ/Bolungarvík.
Jóhannes Kristinn Bjarnason
Jóhannes Kristinn Bjarnason, 15 ára sonur Bjarna Guðjónssonar lék sinn fyrsta leik með meistaraflokki KR í gær er liðið mætti Keflavík. Bjarni er aðstoðarþjálfari liðsins en Jóhannes Kristinn er gríðarlegt efni. Leiknum lauk með 1-1 jafntefli Stórlið hafa fylgst með framgöngu hans um nokkurt skeið þrátt fyrir ungan aldur og í vetur fór hann í heimsókn til Rangers í Skotlandi. Hann æfði einnig með FCK í Danmörku og Genk í Belgíu. Jóhannes er klókur miðjumaður en mikið hefur verið látið með kauða frá unga aldri og verður fróðlegt að sjá hvort hann fái tækifæri með KR í sumar en Pepsi Max-deild karla hefst eftir tæpar tvær vikur. Jóhannes Kristinn hefur spilað fyrir U15 ára lið Íslands.
Ísak Bergmann Jóhannesson
Ísak Bergmann er 17 ára gamall og er sonur Jóa Kalla. Hann samdi við Norköpping í Svíþjóð fyrir einu og hálfu ári og hefur heillað marga í Svíþjóð. Sænska félagið gerir miklar væntingar til Ísaks sem er miðjumaður líkt og faðir sinn. Ísak hefur spilað fyrir U17 og U19 ára landslið Íslands.
Björn Bergmann Sigurðarson
Björn Bergmann er ölu knattspyrnuáhugafólki kunnugur en hann á sömu móðir og Þórður, Bjarni og Jói Kalli. Hann hefur í ellefu ár spilað sem atvinnumaður en er aðeins 29 ára gamall. Björn kom við sögu á HM með íslenska landsliðinu en hann er samningsbundinn Rostov í Rússlandi en er á láni hjá APOEL í Kýpur.
