Erik Hamren stígur sinn síðasta dans sem þjálfari Íslands gegn Englandi á Wembley á morgun. Um er að ræða síðasta leikinn í Þjóðadeildinni þar sem liðið er án stiga.
Eins og áður fer leikurinn fram fyrir luktum dyrum vegna COVID-19 en Erik Hamren hefur ekki áhyggjur af því að smit komi upp hjá liðinu. „Ég hef ekki áhyggjur af liðinu, ég treysti starfsliði okkar. Við höfum verið mjög agaðir í þessu. Hlutir geta auðvitað komið upp þrátt fyrir að þú sért að vanda þig. Ég hef ekki haft áhyggjur, þetta er fjórða landið okkar á sex dögum. Þetta hefur ekki verið vandamál í okkar hóp,“ sagði Hamren.
Gylfi Þór Sigrðsson, Aron Einar Gunnarsson, Ragnar Sigurðsson, Jóhann Berg Guðmundsson, Viðar Örn Kjartansson og Hörður Björgvin Magnússon eru fjarverandi á morgun.
„Við spilum alltaf okkar sterkasta liði sem er í boði, við höfum spilað tvo keppnisleiki. Við erum í meiri vandræðum en England og Danmörk sem fengu einn vináttuleik. Það hefur áhrif á okkur, við getum ekki drepið leikmennina og spilað þeim alla þrjá leikina í 90 mínútur. Margir eru líka að spila mikið með félagsliði, það eru nokkur meiðsli. Við þurfum að hugsa um það, við reynum alltaf að stilla upp okkar besta liði. Við vitum að við föllum í B-deild Þjóðadeildarinnar en það er alltaf stoltið. Þegar þú spilar fyrir landsliðið þá ertu að spila fyrir þjóð þína.“
„Það er alltaf mikilvægt að vera stoltur þegar þú spilar fyrir þjóðina, við viljum alltaf vinna. Við höfum alltaf reynt að vinna, þetta hefur verið erfið Þjóðadeild. Ég vil sjá góða frammistöðu og þá geta úrslitin komið í kjölfarið.“
Ísak Bergmann Jóhannesson ásamt fjórum öðrum úr U21 landsliðinu er mættur til Englands, hann gæti spilað sinn fyrsta A-landsleik á morgun.
„Ísak er mættur hingað ásamt fjórum öðrum úr U21 árs landsliðinu. VIð sendum sex leikmenn heim og fimm komu inn í þeirra stað. Ísak er hæfileikaríkur eins og hinir, hann verður mikilvægur hlekkur fyrir Ísland í framtíðinni. Þeir eru hérna til að fá reynslu með A-landsliðinu. Ísak gæti byrjað sinn feril með landsliðinu á Wembley, það er draumur hjá mörgum. Hann er heppinn strákur.“
„Við reynum alltaf að ná í stig, ég myndi elska það að vinna leikinn sem er minn síðasti með liðið. Það væri líka frábært fyrir leikmennina sem eru að hætta með landsliðinu og fyrir þá ungu sem eru að byrja. Að spila gegn Englandi er merkilegt og það á Wembley.“
