Joe Gomez varnarmaður Liverpool fór í aðgerð á hné í dag vegna meiðsla sem hann varð fyrir á æfingu enska landsliðsins í gær.
Um er að ræða sinar í hné sem eru í kringum hnéskel hjá varnarmanninum. Óvíst er hvort hann geti spilað aftur á þessu tímabili.
Liverpool segir í yfirlýsingu að engin skaði hafi orðið á liðböndum hjá Gomez.
Varnarmaðurinn verður í spelku í 2-3 mánuði til að hjálpa við bataferlið en Liverpool útilokar ekki að Gomez geti spilað í lok leiktíðar.
Í eðlilegu árferði er endurhæfing á svona meiðslum 6-8 mánuðir en óttast var að Gomez yrði jafnvel lengur frá.
Atvikið kom eins og fyrr segir upp á æfingu enska liðsins í gær en enginn var í kringum Gomez. „Hann sendi boltann og það var enginn í kringum hann, hann endaði í jörðinni og var sárþjáður,“ sagði Nick Pope markvörður landsliðsins um atvikið.
„Sem knattspyrnumaður þá skynjaru strax þegar eitthvað svona óeðlilegt á sér stað, það sást um leið að hann var sárþjáður. Það er erfitt að horfa upp á vin og liðsfélaga þjást svona.“