David Alaba varnarmaður FC Bayern er sagður byrjaður að skoða sitt næsta skref á ferlinum en hann nær ekki samkomulagi við félagið um nýjan samning.
Þessi öflugi varnarmaður frá Austurríki fær ekki þá launahækkun sem hann vill í gegn og er hann byrjaður að skoða hvaða kosti hann hefur.
Þýskir og enskir miðlar segja frá því í dag að Liverpool sé líklegur áfangastaður Alaba en hann getur farið frítt frá Bayern næsta sumar.
Alaba getur spilað sem bakvörður og miðvörður og gæti hann leyst vandamál Jurgen Klopp í hjarta varnarinnar þar sem vantar breidd.
Alaba er 28 ára gamall en hann hefur verið í herbúðum Bayern frá árinu 2010 en sú dvöl gæti nú senn tekið enda.
Þýskir miðlar telja engar líkur á því að Alaba muni komast að samkomulagi við Bayern og gæti hann farið í janúar eða næsta sumar.