Frank Lampard, knattspyrnustjóri Chelsea, hefur valið  fyrrum markmann félagsins, Petr Cech, í úrvalsdeildarhóp félagsins. The Athletic greinir frá.

Cech lagði hanskana á hilluna í fyrra og gegnir nú starfi tæknilegs ráðgjafa hjá félaginu.

Ákvörðunin að hafa Cech í hópnum er tekin með Covid-19 að leiðarljósi. Fari svo að núverandi markmenn félagsins greinist með veiruna þá getur Cech tekið stöðu markmanns í liðinu.

Cech er 38 ára gamall. Hann spilaði á sínum tíma meðal annars með Chelsea og Arsenal og á að baki 754 leiki á sínum atvinnumannaferli. Cech vann 13 titla með Chelsea, þar á meðal ensku úrvalsdeildina fjórum sinnum og Meistaradeild Evrópu einu sinni.

Chelsea hefur verið í markmannsvandræðum. Kepa Arrizabalaga hefur ekki náð að sannfæra Lampard og því var Edouard Mendy keyptur til liðsins í sumar. Einnig er Willy Caballero markmaður hjá félaginu.

Cech mun ekki æfa með aðalliði félagsins. Hann mun þó þurfa að halda sér í formi og vera reiðubúinn ef ske kynni að smit kæmi upp hjá leikmönnum félagsins.