Aron Einar Gunnarsson leikmaður Al-Arabi missir af bikarúrslitaleik liðsins í dag sökum verkefna með íslenska landsliðinu. Ísland mætir Danmörku á morgun í Þjóðadeildinni.
„Það var aldrei í plönum að spila þennan leik, þeir gáfu leyfi fyrir Dana leiknum líka. Ég þakka Heimi Hallgrímssyni og klúbbnum fyrir það, ég held að Birkir Bjarnason eigi rétt á medalíu líka. Vonandi bíður manni medalía við heimkomu,“ sagði Aron Einar á fréttamannafundi í dag
Mikilvægasti leikur Íslands í þessu verkefni var á fimmtudag þegar liðið vann Rúmeníu og er liðið því komið í úrslitaleik gegn Ungverjalandi um laust sæti á EM.
„„Það fór mikil orka í þann leik en það er ekkert vesen að gíra sig upp í leik gegn Dönum. Við viljum berjast fyrir því að vinna fyrsta sigurinn gegn þeim, það ætti að gefa okkur eitthvað. Mikilvægasti leikurinn var á fimmtudag en þetta er þannig hópur að það er fullur fókus á morgundaginn. Við ætlum okkar að vinna á morgun, Danir eru gífurlega sterkir og með góða einstaklinga.“
Sterkasta lið Íslands hefur ekki spilað saman lengi og því eru leikirnir mikilvægir til að finna takt.
„Það er langt síðan að við höfum spilað saman þessi hópur, það er mikilvægt að finna takt. Það er hollt fyrir alla að spila saman, en fyrst og fremst ætlum við að vinna þennan leik.“