Veigar Páll Gunnarsson fékk samning lífs síns þegar hann ákvað að fara frá Stjörnunni og ganga í raðir FH fyrir tímabilið 2017. Þetta kemur fram í hlaðvarpsþætti Hjörvars Hafliðasonar þar sem hann ræðir við Rúnar Pál Sigmundsson þjálfara Stjörnunnar.
Rúnar hefur lengi verið við stýrið í Garðabæ, liðið varð Íslandsmeistari árið 2014 og bikarmeistari árið 2018 undir hans stjórn. Rúnar hefur þurft að taka margar erfiðar ákvarðanir og ein af þeim var að losa sig við Veigar Pál.
„Veigar Páll. Átti hann mikið eftir? Nei. Hann fór í FH og fékk samning lífs síns þar á þessum aldri,“ sagði Rúnar Páll um þá ákvörðun að láta Veigar fara. Ákvörðunin þótti umdeild enda Veigar einn dáðasti sonur Garðabæjar í fótboltanum. Skrefið yfir hraunið á milli Garðabæjar og Hafnarfjarðar var því eðlilegt fyrir alla aðila að mati Rúnars.
„Þetta var komið fínt hjá honum og hann stóð sig vel fyrir okkur. Ég var algjörlega heiðarlegur við bæði Garðar og Veigar. Við töluðum íslensku og ekkert vesen og síðan fær Veigar mjög góðan samning hjá FH. Frábært hjá honum en hann fer svo í Víking og það fjaraði svo út. Var það rétt ákvörðun hjá mér? Já, ég vil meina það.“
Veigar lék hálft tímabil með FH áður en hann var lánaður til Víkings og lagði svo skóna á hilluna.